Petrarch Laura Francesco Petrarch and Laura For a woman he would never know
For a woman he could never have
He should change the world forever
site map   contact  

  PETRARCH
  LAURA & OTHERS

  PICTURES
  WRITINGS
  BOOKS

  THE COLLECTION

  EVENTS
  PAPERS & ESSAYS
  MUSIC SETTINGS

  FAQs
  WEB LINKS
  SITE MAP

  CONTACT

Google


Search this Site
Search the Web



Bucolicum Carmen

Francesco Petrarca

Dedalus

     Gallus 
     Tale quis ingenium, tanti quis muneris usum? 
     Vt niueum compegit ebur, neruosque loquentes 
     Addidit ac numeros! Dic, o Tirrene, quis ille? 
     Dedalus? Anne alius dextre successor et artis? 
     Tirrenus 
5    Dedalus ipse fuit, nec falleris omine, Galle, 
     Artificum stupor eternus, quem docta potensque 
     Miratur natura uirum; michi maximus ille 
     Argutam dedit hanc citharam plectrumque modosque. 
     Gallus 
     Cuius amor meriti? cuius pulcherrima merces? 
     Tirrenus 
10   Nullius. Nam sponte meum quesiuit amorem, 
     Dignus quem silue, quem grex, quem pastor adoret. 
     Gallus 
     Qua tamen hec regione tibi sors obuia uenit? 
     Tirrenus 
     Est nemus aerium, trabibus quo frigida quernis 
     Submouet umbra diem; non illic aura, nec estus, 
15   Non gregis aut hominum uernos premit ungula flores; 
     Fontibus auersis circum duo flumina surgunt, 
     Hoc secat Etruscos, petit illud gurgite Romam: 
     Hic, quasi uenturi presagus, tristia mecum 
     Plurima uoluebam, flebam quoque; uidit ab alto 
20   Dedalus annosas inter considere fagos; 
     Accessit, citharamque ferens: - puer, accipe, dixit; 
     Hac casus solare tuos, hac falle laborem. - 
     Gallus 
     Infelix! ubi tunc aberam? Fortasse fuisset 
     Hec fortuna alii; citharam michi Dedalus illam; 
25   Nouit enim egregie, atque interdum uisus amare est. 
     Tirrenus 
     Hanc minime; sed forte aliam, nam milia multa 
     Ille habet et large partitur munera in omnes, 
     Galle; sed, ante diu quam presens silua uireret, 
     Hec fuerat promissa michi. Namque anxia partu 
30   Mater anelanti Lucinam uoce rogabat, 
     Et mestum, ignarus lucis, iam limen adibam; 
     Attulit ecce pium fors Dedalon; haud mora, mixto 
     Vagitu gemituque graui concussus, apertas 
     Substitit ante fores; deque obstetricibus uni: 
35   - Si puer est, citharam dabimus; si nata, monile, 
     Dixerat, ac speculum; - subitoque euanuit. Inde 
     Polliciti rediitque memor, factoque beauit, 
     Gallus 
     Vtilis inuidie species imitatio feruens, 
     Incutiensque animo stimulos, Tirrene, fatebor. 
40   Ardeo nunc similem citharam, nisi forsitan ista 
     (Quod malim) caruisse uelis. Sunt uellera nobis 
     Mollia, sunt hedi; pretium, uel grande licebit, 
     Ipse rei parue statuas. Parebitur ultro. 
     Tirrenus 
     Grande rei parue? Cithare solatia nescis; 
45   Rem magnam (sit nota) uoces: fastidia mulcet, 
     Lassatos animos refouet, solatur amicos, 
     Gaudia restituit, pellit de pectore luctum, 
     Exiccat lacrimas, compescit flebile murmur, 
     Spes reuehit, frangitque metus, uultumque serenat. 
     Gallus 
50   Quid pretio maiore uetat uel magna pacisci? 
     Tirrenus 
     Non michi setigeri quantumuis pascitur usquam 
     Villigerique gregis, nedum leue uellus et hedi 
     Sit pretium cithare; non si tibi gurgite latos 
     Ambiat Hermus agros, rutilisque oblimet arenis. 
55   Quid michi diuitie? quid rerum mutus aceruus? 
     Nostras cernis opes: Hec est, qua crebra rebellis 
     Prelia fortune mundique prementia uincla 
     Pauperiemque leuo; rigidas hac sepe per Alpes, 
     Perque nemus uacuum, perque atra silentia noctis 
60   Fisus eo; plaudunt uolucres et concaua saxa, 
     Interea tristes fugiunt per nubila cure. 
     Gallus 
     Laude sitim cumulas; fer opem, optatoque potiri, 
     Te duce, contingat; uiuam memor emoriarque. 
     Tirrenus 
     Sera animum que cura subit? Breuis ecce iuuente 
65   Flos cecidit. Tunc tempus erat! Iam discere turpe est 
     Quod pulcrum didicisse foret. Sic uoluitur etas, 
     Omnia sic uoluit fugiens, ac nescia freni. 
     Sorte tua contentus abi, citharamque relinque; 
     Est quibus a teneris tractata suauiter annis. 
     Gallus 
70   Posceris auxilium; tu consulis? Incipe rebus 
     Mecum; uerba aliis, quos possunt uerba mouere. 
     Poscimus hanc auide; toto nil pulcrius orbe est. 
     Tirrenus 
     Pulcra mouent oculos, sed prosunt apta fruenti; 
     In partesque uenit pudor atque modestia uoti. 
     Gallus 
75   O felix, o care deis, Tirrene, supernis! 
    
    


© Copyright 1999-2006
Peter Sadlon
Updated Sept 10th 2007

A Merentha Entertainment Project


PETRARCH LAURA PICTURES WRITINGS BOOKS EVENTS PAPERS SETTINGS FAQs CONTACT